أعلنت الإعلامية سالي عبدالسلام عبر حسابها بموقع تبادل الفيديوهات والصور انستجرام فقد توأمها.

وكتب سالي عبدالسلام قائلة: قدر الله وما شاء فعل، من كام يوم وده بعد سنتين انتظار التؤام اللي كان نفسي فيهم أوي يا رب.. سنتين صبر وانت مفيش قدامك غير الصبر زي أي رزق والحمدلله أن اختباري كان في الصبر وبس مش أكتر، وكنت طالباها تيجى من عند ربنا خالص ومن غير تدخل دكاترة.. الحمدلله على نعمة الأخذ بعد العطاء .. يا رب فقدت أغلى ما ليا .. واللي كان هيكون ليا..الحمدلله.. قدري الحمد لله أنا بكتب الكلام ده عشان يمكن حد يتعلم.

سالي عبدالسلام تطالب السيدات بالحذر والكتمان

أضافت عبدالسلام: «كل حد قالي وقال عليا مش عايزة تخلف عشان خايفة على جسمها وشغلها.. وكانت أوحش حاجة سمعتها في حياتي، وهم لا يعلمون شيئاً، عشان كل حد بيضغط على اللي قدامه وفاكر انه حقه وده لا يحق له عشان المفروض انه قريب أو معتبر نفسه كدة، ومش من أهله اصلاً ولا يحق له، ويحسسهم أن وراهم تارجت يا إما هيكون منبوذ منهم وهنسود عيشتك بسؤالنا كل شهر ونضغط عليك مع أنهم مش هيشيلوا أصلا ومحدش هيشيل غيرك.. وهم لا يعلمون شيئاً».

وتابعت: «اوعى تقولي انك حامل وخافي من العين واي كلام في الموضوع ده بالذات !!!اهه مقولتش وبرضه محصلش ومع احترامي ليهم العرسة بتخلف ده مش انجاز ... وهم لا يعلمون شيئاً، عشان كل ست اوعي تبقي بـ 100 ست و تشيلى مسؤولية كل حاجة لوحدك "لوحدك".. الست الجدعة بجد مبتاخدش حاجة.. الست الجدعة محدش بيساعدها وكله بيرمى عليها وكمان لما منعرفش نبقى زيها نعطلها أو نقلل منها وبمعنى أصح نبقى سبب في سقوط كل حاجة فيها مش أطفالها بس ! يا ريتني قولت مبعرفش أو مش هقدر عشان موصلش لكدة».

واختتمت: «كلنا تعبنا وبنتعب ومحدش بيحس ومحدش طلب منك تحس بس الرحمة... الرحمة، كل اللي كتبت عنهم بيني وبينكم الله...إنا لله وإنا إليه راجعون.. ادعولى كتير .. راضية والحمد لله، بس بنهار وأنا بصلي ومش بطلب غير الثبات من ربنا، بس ليا بيتين في الجنة.. اخترت الأخرة والأبقى يا الله».